1950-ൽ കെ എൻ എം രൂപീകരിച്ചപ്പോൾ കെ എൻ എമ്മിന് ഒരു മുഖപത്രം വേണം എന്ന തീരുമാനമുണ്ടായി. അങ്ങനെയാണ് മൂസ മൗലവിയുടെ പത്രാധിപത്യത്തിലെ അൽമനാർ കെ എൻ എം ൻ്റെ മുഖപത്രമായി മാറിയത്. മുസ്ലിം സമൂഹത്തെ മതപരമായും വിദ്യാഭ്യാസപരമായും സാമൂഹിക രാഷ്ട്രീയ മേഖലയിലുമെല്ലാം മതത്തിൻ്റെ അടിസ്ഥാനത്തിൽ സമുദ്ധരിക്കുക എന്ന ലക്ഷ്യത്തിലാണ് അൽമനാർ സ്ഥാപിച്ചിട്ടുള്ളത്. ഏറെ പിന്നാക്കം നിന്നിരുന്ന സ്ത്രീജന വിഭാഗത്തെ ഉയർന്ന വിതാനത്തിലേക്ക് നയിക്കുക എന്ന ശ്രമകരമായ ജോലിയും അൽമനാർ ഏറ്റെടുക്കുകയുണ്ടായിട്ടുണ്ട്. ഇതിൻ്റെയെല്ലാം സത്ഫലങ്ങൾ ഇന്ന് സമുദായം അനുഭവിക്കുന്നുണ്ട്.
അൽമനാർ പ്രസിദ്ധീകരണം തുടങ്ങിയിട്ട് എഴുപത്തിയഞ്ച് വർഷം പിന്നിടുകയാണ്. ഇതൊരു നിസ്സാര കാലയളവല്ല. യാഥാസ്ഥിതികതയുടെയും മതനിഷേധ ഭൗതിക പ്രവണതകളുടെ കാറ്റിലും കോളിലുമൊന്നും ആടിയുലയാതെയും തളർന്നുപോവാതെയും ഇന്നോളം തലയെടുപ്പോടുകൂടി തന്നെ അൽമനാർ പിടിച്ചുനിന്നു. അൽഹംദുലില്ലാഹ്.